فى ذكرى ميلاد الزعيم( جمال عبد الناصر) ال90

بسم الله الرحمن الرحيم

من ايام قليله عدت وبالظبط ف 15 يناير اللى فات مرت 90 سنه على رحيل الاسطوره الزعيم الخالد جمال عبد الناصر
وكالعاده صهين التليفزيون عن ذكراه وكانه مكنش رئيس وطلع زكراه فطيس
لكن انا عن نفسى بحتفل بذكراه من واقع مصريتى اللى شرفها لما حكم مصر
وشرف العروبه لما كان زعيم للامه
وبقوله محتاجينلك ياريس
فلسطين محتجالك
العراق محتاج
الصومال
دارفور
بوش شتتنا
بوش دمرنا
اولمرت دمر غزه
اولمرت عينه من مصر
ارجع وافقع عينه
وخليه اعور زى دايان
ارجع باه


وجايب لكم النهارده مرثيه الشاعر جمال بخيت فى ذكراه
إرجع بأه
وفك حبل المشنقة
وامسح همومنا باللقا
ياجدرنا تحت التراب
يا حلمنا فوق السحاب
يا عمرنا طال العذاب
فى الإنتظار
رجعوا التتار
لكننا أشواك بتتحدى العطش
وجنود بتتحدى الفرار
نسقط ساعات
لكننا نفضل كبار
نفتح عيون للانبهار
متشوقة
فارجع بأه
وفك حبل المشنقة
وارفع راياتك يا أبى
قريش بتسأل عن نبى
يهديها من بعد العمى
خالد قتل مسيلمة
لكن جنوده الكدابين
عينهم فى طابا
يتحدوا فرسان الخطابة
ويلجموهم بالسكوت
فى عصر بيروت الحزين
خالد قتل مسيلمة
لكن جنوده الكدابين
بيفتتوا دلتاك بصبر
وبيحفرولى فى سينا قبر
وبيركبوا نيلى العنيد
وبيخنقونى فى الصعيد
بكلام نكت وبتريقه
فارجع بأه
دا الهزل زاد
والباشا إيده على الزناد
وصدقى بيصلى لفؤاد
وبيحلفوا نرجع عبيد
نتباع فى أسواق الكساد
الهزل زاد
والباشا إيده على الزناد
والسد جوه الفوهة
لو ينسفه تغرق بلادك كلها
وتعود سنين الأوبئة
تسكن ضلوعنا الضيقة
فأرجع بأه
الشمس سكنت كل غرب
حلفت ما ترجع للشروق
من أى شرق
إن لم تكن فى الأنتظار
إنت وسيفك -والتتار تحت القدم-
فأقضى بصوتك على العدم
إعدل موازين الزمان
رتب نجومنا فى الفضا
وأكسى وجوهنا بالرضا
بعد الشقى
دى الأمة لسه محتاجاك
والأرض لسه مهيأة
فأرجع بأه
يمكن تختلف معايا عن الزعيم البطل ويمكن نتفق عن مساؤى وحسنات هذا البطل الاسطوره
ولكن ما ارجوه هو قراءه الفاتحه على روحه
هو كان كل همه نعيش احرار